Астаналық жеңіл атлет Виктория Мельникова – Азия ойындарының күміс жүлдегері!

Астаналық спортшы Виктория Мельникова 2025 жылы Бахрейн астанасы Манамада өтіп жатқан Жасөспірімдер арасындағы Азия ойындарында Қазақстан қоржынына күміс медаль салды.

1500 метрге жүгіру жарысының финалында Виктория 4 минут 51,61 секунд нәтижемен мәреге екінші болып келді. Ол Өзбекстан өкілі Назима Рахимжоноваға небәрі 0,41 секунд айырмашылықпен есе жіберді (4:51.20). Үшінші орынды Шри-Ланка спортшысы Санипа Гимхани иеленді (4:52.32).

Осы сайыста тағы бір қазақстандық спортшы Агата Красаева жетінші орын алды.

Айта кетейік, қазіргі уақытта Қазақстан құрамасының еншісінде төрт медаль бар. Бұған дейін триатлоншы Рамазан Айнегов күміс жүлде иеленген болатын.